💥 रेवदंडा समुद्रात पडून खलाशाचा मृत्यू — दोन दिवसांच्या शोधानंतर तरंगत्या अवस्थेत आढळले प्रेत

थेरोंडा (ता. अलिबाग) येथील एका मासेमारी बोटीवर खलाशी म्हणून काम करणारा परप्रांतीय तरुण प्रदीप कमजोरी (वय 26, मूळ रा. सूरैली गोसाईगंज, जि. सुलतानपूर, उत्तरप्रदेश) हा दि. 30 ऑक्टोबर 2025 रोजी समुद्रात पडून बेपत्ता झाला होता. रेवदंडा पोलीस ठाण्यात तक्रार दाखल झाल्यानंतर रेवदंडा पोलीस आणि कोलाड येथील ‘सह्याद्री वन्यजीव रक्षणार्थ सामाजिक संस्था’ यांची रेस्क्यू टीम सलग दोन दिवस आणि रात्री शोध घेत होती.

छावा डिजिटल न्यूज पोर्टल – रेवदंडा — सचिन मयेकर रविवार – ०२ नोव्हेंबर २०२५

परंतु दुर्दैवाने प्रदीप हा समुद्रात बुडून मृत अवस्थेत आढळून आला आहे. त्याचे प्रेत दि. 0१ नोव्हेंबर रोजी आंग्रेनगर, रेवदंडा परिसरातील समुद्रकिनाऱ्यावर पाण्यावर तरंगताना सापडले.

मिळालेल्या माहितीनुसार, प्रदीप कमजोरी याला दारूचे व्यसन होते. दि. 30 ऑक्टोबर रोजी रात्री सुमारास 9.30 वाजता तो आपल्या सहकाऱ्यांसोबत थेरोंडा येथून साळाव खाडीमार्गे मासेमारीसाठी गेला होता. मात्र, दारूच्या नशेत असताना तो बोटीवरून खाली पडला आणि समुद्रात बुडून हरवला.

याबाबत त्याच्या सहकाऱ्याने तत्काळ रेवदंडा पोलीस ठाण्यात तक्रार नोंदवली होती. त्यानुसार रेवदंडा पोलीस व कोलाड येथील ‘सह्याद्री वन्यजीव रक्षणार्थ सामाजिक संस्था’ यांची रेस्क्यू टीम सलग दोन दिवस आणि रात्री शोध घेत होती. शेवटी काल दि 0१ नोव्हेंबर रोजी आंग्रेनगर, रेवदंडा परिसरातील समुद्रकिनाऱ्यावर पाण्यावर तरंगताना त्याचे प्रेत सापडले.याबाबत अकस्मात मृत्यू रजिस्टर क्र. 38/2025 प्रमाणे नोंद करण्यात आली असून, या घटनेचा अधिक तपास सपोनि श्री. किरवले यांच्या मार्गदर्शनाखाली रेवदंडा पोलीस करीत आहेत