🛑 बनावट नोटा प्रकरणात शेवटी सत्य उघड. आरोपी भूषण पतंगेचा मृत्यू पोलिस मारहाणीने नव्हे तर निमोनिया व संक्रमणामुळे

अलिबाग (रायगड) — काही दिवसांपासून चर्चेत असलेल्या भूषण पतंगे मृत्यू प्रकरणावर अखेर पडदा पडला आहे. बनावट नोटा प्रकरणातील आरोपी असलेल्या पतंगेचा मृत्यू पोलिसांच्या मारहाणीमुळे झाला नसून निमोनिया आणि श्वसन संक्रमणामुळे झाल्याचं जेजे रुग्णालयाच्या अधिकृत शवविच्छेदन अहवालात स्पष्ट झालं आहे.

छावा डिजिटल न्यूज पोर्टल –सचिन मयेकर– अलिबाग शनिवार – १८ ऑक्टोबर २०२५

या निष्कर्षानंतर गेल्या काही दिवसांपासून सुरु असलेले तर्क-वितर्क, आरोप-प्रत्यारोप आणि संशयाला अखेर पूर्णविराम लागण्याची शक्यता आहे.

अधिकृत वैद्यकीय अहवाल समोर

मिळालेल्या माहितीनुसार, भूषण पतंगे हा बनावट नोटा प्रकरणातील संशयित म्हणून अलिबाग पोलिसांच्या ताब्यात होता. काही दिवसांपूर्वी त्याचा उपचारादरम्यान मृत्यू झाल्यानंतर कुटुंबीयांनी “तो पोलिस चौकशीत मारला गेला” असा गंभीर आरोप केला होता. त्यामुळे संपूर्ण प्रकरणाची चौकशी मुंबईतील जेजे रुग्णालयातील वरिष्ठ वैद्यकीय तज्ज्ञांकडे सोपवण्यात आली होती.

मृतदेहावर कोणतीही बाह्य जखम, हाडं मोडलेली चिन्हं किंवा आंतररक्तस्राव आढळलेले नाहीत. मृत्यूचे कारण फुफ्फुसातील सूज आणि संक्रमण (निमोनिया) असून, यामुळे श्वसनसंस्थेचं अपयश झालं.

अहवालात स्पष्टपणे नमूद करण्यात आलं आहे की पतंगेच्या फुफ्फुसांमध्ये मोठ्या प्रमाणात संसर्ग व सूज होती, आणि त्यामुळे त्याला व्हेंटिलेटरवर ठेवण्यात आलं होतं. ऑक्सिजनची पातळी झपाट्याने कमी झाल्याने हृदयावर ताण आला आणि मृत्यू झाला, असा निष्कर्ष वैद्यकीय तज्ज्ञांनी नोंदवला आहे.

पोलिसांवरील आरोप खोटे ठरले

या निष्कर्षानंतर पोलिस विभागाने सुटकेचा श्वास घेतला आहे. पोलिस सूत्रांनी सांगितले

आमच्यावरचे आरोप निराधार होते. वैद्यकीय अहवालाने सत्य स्पष्ट केलं आहे. तपास पारदर्शकपणे करण्यात आला आणि सर्व पुरावे सुरक्षीत ठेवण्यात आले होते.

पतंगेच्या मृत्यूनंतर निर्माण झालेल्या वादात अनेकांनी पोलिसांवर आरोप केले होते. मात्र, अहवाल स्पष्ट झाल्यानंतर आता परिस्थिती स्थिर झाली आहे.

विशेष म्हणजे, पतंगेच्या कुटुंबीयांकडून पोलिसांविरोधात कोणतीही लेखी तक्रार दाखल करण्यात आलेली नाही. प्राथमिक चौकशीत त्यांनी वैद्यकीय अहवालाबाबत समाधान व्यक्त केल्याचं पोलिस सूत्रांकडून सांगण्यात आलं आहे. त्यामुळे या प्रकरणाला आता स्वाभाविक मृत्यूचा निष्कर्ष मिळण्याची शक्यता वाढली आहे.

भूषण पतंगे मृत्यू प्रकरणाने गेल्या काही दिवसांत रायगड जिल्ह्यात मोठं वादळ उठवलं होतं. सामाजिक संस्थांकडून स्वतंत्र चौकशीची मागणीही झाली होती. मात्र, जेजे रुग्णालयाच्या सविस्तर वैद्यकीय अहवालानंतर परिस्थितीत स्पष्टता आली आहे.

अहवालात पोलिस मारहाणीचा कोणताही पुरावा आढळलेला नाही, उलट मृत्यूचं खरं कारण वैद्यकीय स्वरूपाचं असल्याचं निष्पन्न झालं आहे.

अलिबाग पोलिसांनी काही दिवसांपूर्वी छापा टाकून बनावट नोटा तयार करणाऱ्या कारखान्याचा पर्दाफाश केला होता. या छाप्यात भूषण पतंगे याला अटक करण्यात आली होती.

छाप्यात ₹12 लाखांच्या बनावट नोटा, प्रिंटर, शाई, संगणक साहित्य जप्त करण्यात आलं होतं.

याच कारवाईदरम्यान पतंगेची तब्येत बिघडली आणि त्याला रुग्णालयात दाखल करण्यात आलं होतं.

या प्रकरणाचा तपास अद्याप पोलिसांच्या वरिष्ठ अधिकाऱ्यांच्या देखरेखीखाली सुरू आहे.

वैद्यकीय अहवालामुळे पोलिस विभागाला दिलासा मिळालेला असला तरी बनावट नोटा प्रकरणातील इतर पैलूंचा तपास सुरूच आहे.

या घटनेने रायगडमध्ये काही दिवस गोंधळ माजवला असला, तरी आता प्रशासन आणि नागरिक दोघेही “सत्य समोर आलं” असं म्हणत दिलासा घेत आहेत.