आईचा आक्रोश… रुग्णवाहिकेचा सायरन वाजत राहिला पण रस्ता मिळालाच नाही वाहतूक कोंडीच्या विळख्यात २० महिन्यांचा आरांश आई-वडिलांच्या कुशीत चिमुकल्याचा दुर्दैवी अंत लेकराचा श्वास कोंडतोय, कोणीतरी वाचवा… आईची आर्त विनवणीही निष्फळ! उपचारासाठी जाताना रुग्णवाहिका दीड ते दोन तास कोंडीत; मृतदेह घरी नेतानाही तासन्तास अडथळा… रस्त्याच्या कामाच्या नियोजनावर संतापाचा उद्रेक

रस्त्यावर वाहनांच्या लांबच लांब रांगा… रुग्णवाहिकेचा सतत वाजणारा सायरन… आत आपल्या चिमुकल्याला छातीशी कवटाळून बसलेली हतबल आई… आणि मदतीसाठी आर्त हाक देणारे आई-वडील! “माझ्या लेकराचा श्वास कोंडतोय, कोणीतरी वाचवा…” अशी काळीज पिळवटून टाकणारी विनवणी सुरू होती; मात्र रस्त्यावर सुरू असलेल्या कामामुळे निर्माण झालेल्या वाहतूक कोंडीत रुग्णवाहिकेला पुढे जाण्यासाठी मार्गच मिळत नव्हता. अखेर अलिबाग तालुक्यातील बामणगाव येथील अवघ्या २० महिन्यांच्या आरांश सुशील ठाकूर या चिमुकल्याचा आई-वडिलांच्या कुशीतच दुर्दैवी मृत्यू झाला. एका निष्पाप बालकाच्या या मृत्यूने संपूर्ण अलिबाग तालुका हादरला असून, रस्त्याच्या कामाच्या नावाखाली सुरू असलेल्या नियोजनशून्य कारभाराविरोधात नागरिकांचा संताप अनावर झाला आहे.

खेळता खेळता फुगा घशात अडकला; आई-वडिलांची जीवघेणी धावपळ.सोमवार, १६ नोव्हेंबर रोजी आरांश नेहमीप्रमाणे घराच्या अंगणात खेळत होता. खेळता खेळता अचानक फुगा घशात अडकल्याने त्याचा श्वास गुदमरू लागला. चिमुकल्याची प्रकृती गंभीर होत असल्याचे लक्षात येताच पालकांनी क्षणाचाही विलंब न करता त्याला अलिबाग जिल्हा सामान्य रुग्णालयात नेण्यासाठी रुग्णवाहिकेची व्यवस्था केली. मात्र बेलकडे–अलिबाग मार्गावर रस्त्याचे काम सुरू असल्याने वाहनांच्या लांबच लांब रांगा लागल्या होत्या. रुग्णवाहिकेचा सायरन वाजत होता. आई-वडील मदतीसाठी विनवणी करत होते. पण पुढे जाण्यासाठी रस्ता मिळत नव्हता. तब्बल दीड ते दोन तास रुग्णवाहिका वाहतूक कोंडीत अडकून पडल्याचे वृत्त आहे. अखेर मार्ग मोकळा झाल्यानंतर रुग्णवाहिका रुग्णालयात पोहोचली; मात्र तोपर्यंत उशीर झाला होता. डॉक्टरांनी आरांशला मृत घोषित केले. एका आईची लेकराला वाचवण्यासाठी सुरू असलेली धडपड थांबली. घरात हसण्या-खेळण्याचा आवाज करणारा चिमुकला कायमचा शांत झाला!

मृतदेह घरी नेतानाही वाहतूक कोंडीचा विळखा

या घटनेतील सर्वांत वेदनादायक बाब म्हणजे चिमुकल्या आरांशचा मृतदेह घरी घेऊन जातानाही कुटुंबीयांची वाहतूक कोंडीतून सुटका झाली नाही. मृतदेह घरी नेतानाही दोन तासांहून अधिक काळ कुटुंबाला अडथळ्यांचा सामना करावा लागल्याचे वृत्त प्रसिद्ध झाले आहे. दुःखाचा डोंगर कोसळलेल्या कुटुंबाला आपल्या चिमुकल्याला अखेरचा निरोप देण्यासाठी घरी पोहोचतानाही रस्त्यावर ताटकळत राहावे लागले.

जिवंत असताना उपचारासाठी रस्ता मिळाला नाही आणि मृतदेह घरी नेतानाही रस्ता मोकळा मिळाला नाही… यापेक्षा मोठी शोकांतिका कोणती?

हलाखीच्या परिस्थितीत संसार; दोन मुलांपैकी धाकटा आरांश काळाच्या पडद्याआड!

आरांशचे आई-वडील गावातील नाक्यावर भाजी विक्रीचा व्यवसाय करून कुटुंबाचा उदरनिर्वाह करतात. त्यांना दोन मुले असून आरांश हा धाकटा मुलगा होता. अत्यंत हलाखीच्या परिस्थितीत संसाराचा गाडा चालवणाऱ्या या दाम्पत्याच्या आयुष्यात आनंदाचे क्षण घेऊन आलेला चिमुकला अशा प्रकारे काळाच्या पडद्याआड गेल्याने संपूर्ण परिसरात शोककळा पसरली आहे.

दिवाळीच्या सुट्टीनंतर काम सुरू करण्याच्या सूचना; तरी ठेकेदाराने घाई का केली?

या घटनेच्या पार्श्वभूमीवर जिल्हा वाहतूक नियंत्रण विभागाचे पोलीस निरीक्षक सचिन पवार यांनी दिलेली माहितीही महत्त्वाची आहे. दिवाळीच्या सुट्ट्या संपल्यानंतरच काम सुरू करावे, अशा सूचना ठेकेदाराला देण्यात आल्या होत्या. मात्र त्याआधीच ठेकेदाराने काम सुरू केल्याने वाहतुकीचा गोंधळ निर्माण झाल्याचे त्यांनी नमूद केले.

वाहतूक पोलीस अधिकारी व कर्मचारी दिवस-रात्र वाहतूक सुरळीत करण्यासाठी कार्यरत असल्याचे त्यांनी सांगितले. उद्यापासून पर्यायी मार्गाने वाहतूक वळवून वाहतुकीवर नियंत्रण मिळवण्याचा प्रयत्न केला जाईल, असेही त्यांनी स्पष्ट केले.

मात्र प्रश्न असा आहे की, वाहतूक कोंडी निर्माण झाल्यानंतर पर्यायी मार्गाचा विचार करण्याऐवजी काम सुरू करण्यापूर्वीच वाहतुकीचे नियोजन का करण्यात आले नाही? रुग्णवाहिका अडकल्यानंतर तिला तातडीने मार्ग उपलब्ध करून देण्याची व्यवस्था कुठे होती?

रस्त्याचे काम की नागरिकांच्या जीवाशी खेळ?

रस्त्यांचे काँक्रीटीकरण आणि विकासकामांना कोणाचाही विरोध नाही. मात्र काम सुरू असताना दोन्ही बाजूंच्या वाहतुकीचे नियोजन, वाहतूक नियंत्रकांची नियुक्ती, स्पष्ट सूचना फलक, पर्यायी मार्ग आणि आपत्कालीन वाहनांसाठी स्वतंत्र मार्गिका असणे अत्यावश्यक आहे.बेलकडे–अलिबाग मार्गावर सुरू असलेल्या कामामुळे चौल, नागाव, कुरुळ आणि परिसरातील नागरिकांना वाहतूक कोंडीचा सामना करावा लागत असल्याच्या तक्रारी यापूर्वीही समोर आल्या आहेत. सामान्य नागरिक, शालेय विद्यार्थी, एसटी बस, पर्यटक आणि स्थानिक वाहनचालक या कोंडीत अडकत आहेत. मात्र आता या कोंडीचा प्रश्न एका निष्पाप चिमुकल्याच्या उपचारापर्यंत पोहोचला आहे.

जिल्हाधिकारी साहेब आता तरी जागे व्हा

एका निष्पाप बालकाच्या मृत्यूनंतर तरी जिल्हा प्रशासनाला जाग येणार आहे का? संबंधित ठेकेदार, कामावर देखरेख करणारी यंत्रणा आणि वाहतूक नियंत्रण विभाग यांची जबाबदारी निश्चित होणार का? ग्रामस्थांनी संबंधित ठेकेदारावर सदोष मनुष्यवधाचा गुन्हा दाखल करण्याची मागणी केली आहे. या मागणीची प्रशासनाने गांभीर्याने दखल घेऊन घटनेची सखोल चौकशी करणे गरजेचे आहे.

आरांश पुन्हा आईच्या कुशीत खेळायला येणार नाही. त्याच्या घरातील हसू पुन्हा परतणार नाही. एका आईची लेकराला वाचवण्यासाठीची आर्त धडपड आता आयुष्यभराची वेदना बनून राहणार आहे.

विकासकामे झालीच पाहिजेत; पण विकासाच्या नावाखाली नागरिकांच्या सुरक्षिततेकडे दुर्लक्ष होता कामा नये. रस्त्याचे काम काही दिवस उशिरा झाले तरी चालेल, मात्र आपत्कालीन परिस्थितीत रुग्णवाहिकेला रस्ता मिळालाच पाहिजे. हा कोणाचा उपकार नाही, तर नागरिकांचा मूलभूत हक्क आणि प्रशासनाची जबाबदारी आहे.आज आरांशच्या कुटुंबावर ही वेळ आली; उद्या कोणाच्या घरावर येणार?

एका चिमुकल्याचा जीव गेल्यानंतर तरी प्रशासन जागे होणार का? की आणखी एखाद्या आईच्या आक्रोशानंतरच यंत्रणा हालणार?

आरांशला श्रद्धांजली… आणि जबाबदार यंत्रणांना जनतेचा जाब.

छावा डिजिटल न्यूज मीडिया — जनतेचा आवाज, प्रशासनाला जाब!

Loading

Leave a Reply

Your email address will not be published. Required fields are marked *