🌼 अंगणातून आकाशापर्यंत — खरी जिवंत देवी! 🌼 मायेपासून धैर्यापर्यंत, न्यायापासून सेवापर्यंत — प्रत्येक रूपात देवीचं दर्शन!

   सूचना : हा लेख “खरी जिवंत देवी!” हा फक्त स्त्रीशक्तीचा गौरव करण्यासाठी आहे. येथे घेतलेली नावे केवळ उदाहरणादाखल असून, समाजातील सर्वच स्त्रिया देवीच्या रूपात वंदनीय आहेत. कोणाच्याही भावना दुखवण्याचा आमचा हेतू नाही.

तूच आमच्या गावाची कुष्मांडा,

तूच संगणकासमोर बसून प्रकाश पसरवणारी,

तूच आकाशाची दुर्गा,

तूच उड्डाणाची प्रेरणा,

छावा डिजिटल न्यूज पोर्टल सचिन मयेकर रेवदंडा शुक्रवार २६ सप्टेंबर २०२५

 आधुनिक कुष्मांडा

ग्रामपंचायत कार्यालयात संगणकासमोर बसून अथक काम करणारी कोमल हरेश मारकु

ही फक्त डेटा ऑपरेटर नाही, तर गावाची खरी आधारस्तंभ आहे.

गावाचा संवेदनशील कारभार ऑनलाईन करणं,

शेतकऱ्यांचे अर्ज भरून देणं,

लोकांच्या शासकीय योजना वेळेत पूर्ण करून देणं

या सर्व गोष्टी ती जबाबदारीने पार पाडते.

घरातल्या साऱ्या जबाबदाऱ्या उरकून कोमल मॅडम कार्यालयात हजेरी लावतात.

लहान लेकरांना सांभाळणं, घर सांभाळणं आणि त्याच वेळी कार्यालयीन काम प्रामाणिकपणे करणं

हा संतुलनाचा अद्भुत नमुना आहे.

स्वतःच्या पायावर उभं राहत, दोन वेळचं जीवन सन्मानाने जगत,

स्वावलंबनाचा आदर्श निर्माण करणारी हीच खरी देवी.

कोमल मॅडमची बोटं संगणकाच्या की-बोर्डावर फिरताना

गावाचा भविष्याचा आराखडा तयार होत असतो.

म्हणूनच म्हणावं लागतं

हीच खरी आधुनिक कुष्मांडा!

पायलट : आकाशगंगेतील दुर्गा

आकाशात झेप घेणं हे फक्त स्वप्न नसतं, तर ते साकार करण्यासाठी धाडस, मेहनत आणि आत्मविश्वास लागतो.

हजारो फूट उंचीवर शेकडो प्रवाशांचा जीव आपल्या हातात घेऊन उड्डाण करणं

हे काम केवळ धैर्यानेच शक्य होतं.

पायलट स्त्री जेव्हा कॉकपिटमध्ये बसते,

तेव्हा तिच्या डोळ्यांत भीती नसते, तर निश्चयाचं तेज चमकतं.

प्रत्येक बटण, प्रत्येक निर्णय शेकडो कुटुंबांच्या सुरक्षिततेशी जोडलेला असतो.

आणि ती ही जबाबदारी सहजतेने पार पाडते.

आपल्या रेवदंड्याची कृतज्ञा हाले 

आपल्या रेवदंड्यासारख्या छोट्या गावातूनही आज आकाशाला गवसणी घालणाऱ्या मुली उभ्या राहतात.

कृतज्ञा  हाले ही त्यातलीच एक.

तिच्या जिद्दीने आणि कष्टाने तिने हे अशक्यप्राय स्वप्न साकार केलं आहे.

आज कृतज्ञा हाले जेव्हा विमान उडवते,

तेव्हा तिच्या हातात केवळ प्रवाशांचा जीव नसतो,

तर संपूर्ण रेवदंड्याचा अभिमान असतो.

गावातील प्रत्येक लेकराला तिच्यातून नवं स्वप्न दिसतं

“आपणही आकाशाला स्पर्श करू शकतो

खरी दुर्गा

कृतज्ञासारख्या पायलट्स म्हणजे खरी दुर्गा.

त्या दाखवतात की आकाश ही मर्यादा नाही,

तर नवे क्षितिज गाठण्याचं द्वार आहे.