🚨 रेस्क्यू टीम परत दोन दिवस सावध रहा एवढं सांगून निघाली! नागाव–साखर परिसरात भीती शिगेला जीवितहानी झाली तर जबाबदार कोण? असा ग्रामस्थांचा सवाल.

छावा डिजिटल न्यूज पोर्टल – सचिन मयेकर —बुधवार १० डिसेंबर २०२५

नागाव –साखर परिसरात बिबट्याच्या दहशतीने नागरिक दोन दिवसांपासून तणावाखाली असताना, आज दुपारी रेस्क्यू टीमने शोधमोहीम थांबवल्याची धक्कादायक माहिती मिळाली आहे. बिबट्या जिथून आला तिथे परत गेला असेल… दोन दिवस सावधगिरी बाळगा एवढेच सांगून त्यांनी परिसर सोडला. पोलीस पथकही मागे गेलं असून नागरिकांची भीती, अस्वस्थता आणि असुरक्षिततेची भावना आणखी तीव्र झाली आहे.

🔴 आधीच ५ जण जखमी, स्थिती गंभीर. बिबट्याच्या आक्रमक हल्ल्यात पाच ग्रामस्थ जखमी झाले आहेत. जखमींना अलिबाग जिल्हा रुग्णालयात दाखल करण्यात आले होते. अशा परिस्थितीत अजूनही बिबट्या सापडलेला नाही आणि तरीही शोधमोहीम थांबवली गेल्याने नागरिकांमध्ये संताप व भीती वाढत आहे. बिबट्या इथेच असेल आणि जीवितहानी झाली तर जबाबदार कोण? स्थानिक पातळीवर गंभीर प्रश्न उपस्थित केला जात आहे ज्या बिबट्याने पाच जणांना जखमी केले, तो अद्याप हाती लागला नाही; आणि सर्व यंत्रणा मागे सरकल्या. उद्या एखादी जीवितहानी झाली तर जबाबदार कोण? हा प्रश्न सध्या प्रत्येक नागाव साखरकरांच्या मनात घोळतोय. गावात दारे–खिडक्या बंद ठेवण्यापासून मुलांना बाहेर न सोडण्यापर्यंत सावधगिरीचा कडक माहोल आहे. नागावमध्ये बिबट्याचा शिरकाव  सलग कॉम्बिंग ऑपरेशन निष्फळ. बिबट्या दिसल्याची माहिती मिळाल्यानंतर वनविभाग, रेस्क्यू टीम आणि पोलीस प्रशासन सलग दोन दिवस, रात्रभर सर्च ऑपरेशन करत होते. नागावच्या सर्व वाड्या, खाडी, किनारा, साखर खारटाभोवतीचा पट्टा तपासण्यात आला. परंतु इतक्या व्यापक तपासणीनंतरही बिबट्या दिसला नाही. यामुळे तो खाडीमार्गे जंगलाकडे सरकला असण्याची शक्यता गृहीत धरली जात आहे; तरीही परिसरात त्याचा वावर असू शकतो, असा इशारा देण्यात आला आहे. प्रशासनाने नागरिकांना अफवा न पसरवण्याचे आणि बिबट्या दिसल्यास तात्काळ कळवण्याचे आवाहन केले आहे.

🛑 पर्यटन क्षेत्रावर थेट फटका. बिबट्याच्या वावराचा परिणाम नागाव–अक्षी–साखर किनाऱ्यावरील पर्यटनावर तीव्र दिसत आहे. अनेक हॉटेल्सची बुकिंग रद्द, पर्यटक येण्यास घाबरत असल्याने चौकशी वाढली, बीचवर ओस पडलेले वातावरण  स्थानिक व्यावसायिकांनी थेट नुकसान सुरू झाल्याचे सांगितले.

“जर बिबट्या परत गेला असेल  तर अधिकृत घोषणा का नाही?” परिसरात तणाव वाढत असताना नागरिकांचा एकच सवाल  जर अधिकारी सांगत आहेत की बिबट्या जंगलात परत गेला असेल, तर त्याबाबत अधिकृत निवेदन, खात्री किंवा लिखित माहिती का देण्यात आलेली नाही? कारण चुकीची माहिती ग्रामस्थांपर्यंत पोहोचली तर जबाबदारी कोणाची? स्थानिकांनी प्रशासनाकडून स्पष्टता, सतत अपडेट्स आणि पुन्हा एकदा शोधमोहीम सुरू करण्याची मागणी केली आहें.

आज साखर गावांत सुद्धा बिबटा दिसल्याच्या बातम्या ऐकू येत होत्या.