🔴 कोरोना काळातील ‘देवदूत’ दिलीप भोईर यांना मोठा दिलासा; 21 आरोपींसह उच्च न्यायालयाचा जामीन

अलिबाग : रायगड जिल्हा परिषदेचे माजी सभापती दिलीप भोईर उर्फ छोटम आणि त्यांच्यासोबतच्या 21 आरोपींना मुंबई उच्च न्यायालयाने जामीन मंजूर करत मोठा दिलासा दिला आहे. सत्र न्यायालयाने नुकतीच सुनावलेली शिक्षा आदेश उच्च न्यायालयाने स्थगित ठेवत सर्व आरोपींना अंतरिम जामीन मंजूर केला. त्यामुळे भोईर यांच्या समर्थकांत आनंदाचे वातावरण आहे.

छावा डिजिटल न्यूज पोर्टल ––सचिन मयेकर,बुधवार – १९ नोव्हेंबर २०२५

ही घटना तब्बल 13 वर्षांपूर्वीची आहे. अलिबाग तालुक्यातील चौधी येथे संगणक प्रशिक्षण केंद्र चालवणाऱ्या रुपाली थळे, त्यांचे पती विजय थळे आणि त्यांच्या नातेवाईकावर झालेल्या हल्ल्याच्या प्रकरणात दिलीप भोईरसह इतर आरोपींवर गुन्हा नोंदवला गेला होता. या प्रकरणात पोलिसांनी एकूण 25 आरोपींविरुद्ध दोषारोपपत्र दाखल केले होते.

काही दिवसांपूर्वी अलिबाग सत्र न्यायालयाने दिलीप भोईर यांच्यासह 22 जणांना दोषी ठरवत सात वर्षांची सक्त मजुरी आणि दंडाची शिक्षा सुनावली होती. या निर्णयाने रायगडमधील राजकीय वर्तुळात मोठी खळबळ माजली होती.

या शिक्षेविरोधात दिलीप भोईर यांनी तत्काळ मुंबई उच्च न्यायालयात अपील दाखल केले. या सुनावणीदरम्यान न्यायालयाने सत्र न्यायालयाच्या शिक्षेला स्थगिती देत भोईर आणि सर्व 21 आरोपींना जामीन मंजूर केला.

कोरोना काळात दिलीप भोईर यांनी केलेल्या मदतीमुळे त्यांना ‘देवदूत’ म्हणून ओळख मिळाली होती. वैद्यकीय सेवा, रुग्णांना दिलासा, अन्नधान्य वितरण, गरजूंना मदत या सर्व उपक्रमांमुळे ते त्या काळात लोकांच्या मनात खोलवर पोहोचले होते. त्यामुळे शिक्षा सुनावल्यानंतर निर्माण झालेली चिंता आता उच्च न्यायालयाच्या निर्णयामुळे कमी झाली आहे.

उच्च न्यायालयाच्या या आदेशामुळे रायगड जिल्ह्यातील राजकीय वातावरणात पुन्हा एकदा नवा ट्विस्ट तयार झाला आहे. भोईर समर्थकांमध्ये उत्साह दिसत आहें.