शासकीय कार्यालयांत तंबाखूचा माज; शिस्त आणि सार्वजनिक आरोग्य धोक्यात

• छावा विशेष | संपादकीय
• ता. २३/०१/२६

शासकीय कार्यालये ही जनतेच्या विश्वासाची, शिस्तीची आणि सार्वजनिक आरोग्याची प्रतीकं मानली जातात, मात्र प्रत्यक्षात काही ठिकाणी अधिकारीच तंबाखू, विमल, गुटखा सेवन करत असल्याचे आणि कार्यालयीन परिसरातही तंबाखू खाल्ला जात असल्याची भावना नागरिकांमध्ये निर्माण झाली आहे, आणि हाच मुद्दा आता चर्चेचा केंद्रबिंदू ठरत आहे. तंबाखू सेवन हा वैयक्तिक सवयीचा विषय असला तरी जेव्हा तो शासकीय कार्यालयात किंवा त्याच्या परिसरात घडतो, तेव्हा तो वैयक्तिक न राहता सार्वजनिक शिस्त आणि जबाबदारीचा प्रश्न बनतो.

इंदापूर येथील शासकीय कार्यालयात तंबाखू खात काम करत असलेला अधिकारी प्रत्यक्षात पकडला गेल्यानंतर त्याच्यावर कारवाई करण्यात आली, ही बाब स्वागतार्ह असली तरी यामुळे एक व्यापक वास्तव समोर आले आहे की नियम असतानाही त्यांची अंमलबजावणी सर्वत्र समानपणे होत नाही. शासकीय कार्यालये आणि त्यांचा परिसर तंबाखूमुक्त असावा, अशी स्पष्ट तरतूद असतानाही काही ठिकाणी याकडे दुर्लक्ष होत असल्याची भावना नागरिकांमध्ये आहे, आणि त्यामुळे नियमांची विश्वासार्हताच प्रश्नांकित होते.

अलिबाग तालुक्यातील काही शासकीय कार्यालयांबाबतही अशीच चर्चा ऐकू येत असून, अधिकारी तंबाखू सेवन करतात तसेच कार्यालयीन परिसरातही तंबाखू खाल्ला जातो, अशी भावना व्यक्त केली जात आहे. या संदर्भात काही फोटो छावा कडे पाठविले गेले असून, ते नोंद आणि माहिती म्हणून उपलब्ध आहेत, मात्र येथे कोणत्याही व्यक्तीवर किंवा कार्यालयावर थेट आरोप करण्याचा उद्देश नाही, तर केवळ सार्वजनिक शिस्तीच्या मुद्द्याकडे लक्ष वेधणे एवढाच हेतू आहे.

तंबाखू सेवनाचे आरोग्यावर होणारे दुष्परिणाम सर्वश्रुत आहेत, आणि अशा पार्श्वभूमीवर शासकीय कार्यालयांनीच तंबाखूमुक्त वातावरण राखले नाही, तर समाजाला नेमका कोणता संदेश दिला जातो, हा प्रश्न उपस्थित होतो. नियमांची अंमलबजावणी करणाऱ्या अधिकाऱ्यांकडूनच नियम पाळले जात नसतील, तर त्या नियमांचे महत्त्व जनतेपर्यंत पोहोचणार कसे, हा मूलभूत सवाल आहे.

म्हणूनच हा मुद्दा कारवाई किंवा दोषारोपांपुरता मर्यादित न ठेवता, सजगता, शिस्त आणि जबाबदारी या दृष्टिकोनातून पाहिला गेला पाहिजे. शासकीय कार्यालये आणि त्यांचा परिसर खऱ्या अर्थाने तंबाखूमुक्त ठेवणे ही केवळ सूचना नव्हे, तर सार्वजनिक आरोग्य आणि प्रशासकीय प्रतिष्ठेची गरज आहे, आणि यासाठी सातत्यपूर्ण अंमलबजावणी, स्पष्ट नियम आणि सर्वांसाठी समान शिस्त आवश्यक आहे.

✍️ छावा ठाम भूमिका घेतो

तंबाखू, विमल, गुटखा यांसारख्या सवयी शासकीय कार्यालये आणि परिसरातून पूर्णपणे हद्दपार व्हाव्यात, नियम कागदावर न राहता प्रत्यक्षात दिसावेत, आणि शिस्तीचा आदर्श सर्वप्रथम शासकीय यंत्रणेकडूनच निर्माण व्हावा

हा लेख कोणत्याही व्यक्ती, अधिकारी किंवा कार्यालयावर थेट आरोप करण्यासाठी नसून, शासकीय कार्यालये व त्यांच्या परिसरात तंबाखू सेवनाबाबत सार्वजनिक शिस्त व आरोग्याच्या दृष्टीने सजगतेची गरज अधोरेखित करण्यासाठी आहे.

दुपारी ३ वाजताचा लेख अनिवार्य कारणांमुळे उशिराने प्रकाशित होत आहे. वाचकांनी नोंद घ्यावी.