शनिवार विशेष | गोड शब्दांचा सापळा आणि मनातला विष – कपटी लोक ओळखायचे कसे?

• छावा डिजिटल मीडिया न्यूज पोर्टल
• ✍️ सचिन मयेकर
• 📅 शनिवार , ३ जानेवारी २६

आजच्या काळात माणूस ओळखणं सर्वात कठीण झालं आहे. समोरचं हसू खरं आहे की मुखवटा, बोललेले शब्द मनातून आहेत की स्वार्थातून, हे ओळखायला अनेकदा उशीर होतो. तोपर्यंत नाती तुटलेली असतात, मन दुखावलेलं असतं आणि विश्वास चुरगळलेला असतो. कपटी लोक हे तलवार घेऊन येत नाहीत, ते गोड शब्द घेऊन येतात आणि नकळत आपल्याच मनावर वार करतात.

कपटीपणा म्हणजे मोठा कट नव्हे, तर हळूहळू विणलेला जाळा असतो. तो ओळखायला काही ठराविक लक्षणं दिसतात. ती वेळेत समजली तर अनेक फसवणुका टाळता येऊ शकतात.

१) शब्दांची श्रीमंती, पण कृतीत दारिद्र्य

कपटी माणूस बोलण्यात अतिशय प्रभावी असतो. तो तुम्हाला समजून घेतो, तुमचं कौतुक करतो, तुमच्या भावना मान्य करतो, पण जेव्हा मदतीची, पाठिंब्याची किंवा जबाबदारीची वेळ येते, तेव्हा तो गायब होतो. शब्द आणि वागणूक यामधील ही दरी हे कपटाचं पहिलं लक्षण असतं.

२) तुमच्याशी गोड, पण इतरांबद्दल कायम कडू

जो माणूस नेहमी तिसऱ्यांची निंदा करतो, तो माणूस विश्वासू नसतो. आज तुमच्यासमोर दुसऱ्याला कमी लेखणारा उद्या तुमच्या अनुपस्थितीत तुमच्याबद्दल तेच करणार. कपटी लोक नातं जोडत नाहीत, ते फूट पाडतात.

३) गरज संपली की नात्यालाही फुलस्टॉप

कपटी लोकांचं नातं हे व्यवहारासारखं असतं. जोपर्यंत त्यांना तुमच्याकडून फायदा मिळतो, तोपर्यंत ते जवळ असतात. काम झालं की फोन बंद, भेटी थांबतात, आणि ओळखही धुसर होते. अशा लोकांसाठी माणसं नव्हे, तर साधनं महत्त्वाची असतात.

४) चूक कधीच आपली नसते

स्वतःची चूक मान्य करणं ही मोठ्या मनाची खूण असते. पण कपटी लोक कधीच चूक मान्य करत नाहीत. परिस्थिती, इतर माणसं, नशीब किंवा वेळ – कुणीतरी दोषी असतो, पण ते कधीच नाहीत. ही मानसिकता भविष्यात मोठ्या अडचणी निर्माण करते.

५) तुमचा विश्वासच बनतो हत्यार

विश्वासाने सांगितलेली गोष्ट पुढे तुमच्याच विरोधात वापरली गेली, तर तो केवळ गैरसमज नसतो. कपटी लोक माहिती साठवतात, भावना नाही. ती माहिती योग्य वेळी वापरून ते दबाव टाकतात, बदनामी करतात किंवा नियंत्रण ठेवतात.

६) समोर सहानुभूती, आत स्वार्थ

कपटी लोक तुमच्या दुःखावर डोळे पुसतात, पण मनात त्याचा फायदा कसा होईल याचा हिशेब चालू असतो. त्यांची सहानुभूती अभिनय असतो आणि त्यामागे नेहमीच एखादा हेतू लपलेला असतो.

७) तुमच्यावर अपराधीपणाची भावना लादणं

तुम्ही चुकीचे नसतानाही तुम्हालाच अपराधी वाटायला लावणं, स्वतःचा दोष तुमच्यावर ढकलणं, तुमच्या निर्णयांवर शंका निर्माण करणं  हा कपटीपणाचा अत्यंत धोकादायक प्रकार आहे.

निष्कर्ष

सर्वच माणसं वाईट नसतात, पण प्रत्येकावर डोळे झाकून विश्वास ठेवणं हे स्वतःवर अन्याय करणं ठरू शकतं. सजग राहणं म्हणजे संशयी होणं नव्हे, तर अनुभवातून शहाणं होणं होय. नात्यांमध्ये पारदर्शकता, सातत्य आणि कृती हीच खरी कसोटी असते.