गणपती बाप्पा आणि चांदोबाचे गूढ गुपित
ही आहे बाळगोपाळांसाठी मी आणि माझा चांदोबा मालिकेची पहिली गोष्ट.
लवकरच चांदोबा पुन्हा नवी गोडशी गोष्ट घेऊन येईल…..
आज गणेश चतुर्थी. घराघरांत बाप्पा विराजमान झाले आहेत. ढोलताशांचा गजर, फुलांचा सुगंध, मोदकांचा दरवळ सगळीकडे भक्तिभाव आणि आनंद भरून राहिला आहे. अशा या दिवसामागे एक गोडशी पण गूढ गोष्ट आहे गणपती बाप्पा आणि चांदोबाची.
सचिन मयेकर, संपादकीय ‘छावा’ पोर्टल २७ ऑगस्ट २०२५
खूप खूप वर्षांपूर्वी, भाद्रपद शुद्ध चतुर्थीची रात्र होती. गणपती बाप्पा आपल्या उंदरावर बसून जंगलातून चालले होते. आकाशात चांदोबा उजळून निघाला होता.
तेव्हा चांदोबा बाप्पाकडे पाहून हसला. कधी तो म्हणायचा
गणेशा, तुझं पोट किती मोठं आहे.एवढ्या छोट्या उंदरावर बसलास म्हणजे गंमतच आहे.
तर कधी असंही झालं की बाप्पा भक्तांकडून मोदक खाऊन परतत होते. उंदराला अचानक साप दिसला, तो घाबरून धावला आणि बाप्पा खाली पडले. हातातल्या मोदकांची पिशवी सांडली. हे बघून चांदोबाने मोठ्याने हसून घेतलं.
गणपती बाप्पाला वाईट वाटलं. त्यांनी गंभीर आवाजात म्हटलं
अरे चंद्रा, दुसऱ्याच्या रूपावरून किंवा त्याच्या चुकांवरून थट्टा करणं चांगलं नाही. तू माझी हसवणूक केलीस म्हणून तुला शाप देतो. आजच्या दिवशी जो कोणी तुला पाहील त्याच्यावर खोटा आरोप होईल.
हे ऐकताच चांदोबा घाबरला. त्याला लगेच आपली चूक कळली. तो बाप्पाच्या चरणी पडून म्हणाला
बाप्पा, मला माफ करा. मी नकळत थट्टा केली.
गणपती बाप्पा करुणेचा सागर होते. त्यांनी प्रेमाने म्हटलं
ठीक आहे, चंद्रा. शाप पूर्ण नाहीसा होणार नाही. पण जो भक्त माझी पूजा करेल, माझं नामस्मरण करेल आणि माझी कथा ऐकेल, त्याला तुझं दर्शन झालं तरी काही अपाय होणार नाही.
तेव्हापासून आजपर्यंत गणेश चतुर्थीच्या दिवशी चंद्रदर्शन टाळलं जातं.
या गोष्टीतली शिकवण
कुणाच्याही रूपावरून थट्टा करू नये.
दुसऱ्याच्या चुकांवरून हसणं चुकीचं आहे.
चूक झालीच तर माफी मागावी.
देव आपल्याला क्षमा करून नेहमी योग्य मार्ग दाखवतात.
बालगोपाळांनो, गणपती बाप्पा आपल्याला आनंद, नम्रता आणि क्षमा शिकवतात. चांदोबा आपल्याला सांगतो की डाग असूनही सौंदर्य अबाधित राहतं. म्हणूनच आपण सर्वजण बाप्पाला साद घालूया
गणपती बाप्पा मोरया.
