रेवदंड्यात रक्षाबंधनाचा उत्साह – बहिणींच्या ओवाळणीने उजाळला पवित्र सण
रेवदंडा | ९ ऑगस्ट २०२५
छावा- रेवदंडा – सचिन मयेकर
रेवदंडा गावात आज रक्षाबंधनाचा पवित्र सण पारंपरिक उत्साहात आणि भावनिक वातावरणात साजरा करण्यात आला. सकाळपासूनच गावातील घरोघरी बहिणीने आपल्या भावाला ओवाळून, राखी बांधून आणि गोडधोड भरवून हा अनमोल बंध अधिक घट्ट केला.
विशेष म्हणजे, या उत्सवात चिमुकल्यांनीही मोठ्या उत्साहाने सहभाग घेतला. छोट्या बहिणींनी आपल्या लहान भावांना रंगीबेरंगी राख्या बांधल्या, ओवाळणी केली आणि गोड पदार्थांनी तोंड गोड केले. या दृश्याने उपस्थितांचा हृदय पिळवटून टाकणारा भावनिक क्षण अनुभवला.
गावातील महिलांनी पारंपरिक वेशभूषेत, थाळीत अक्षता, फुले, दिवा आणि मिठाई सजवून भावांना ओवाळले. अनेक भावंडांनी या दिवशी भेटवस्तूंची देवाणघेवाण करून प्रेम आणि आपुलकीचा संदेश दिला.
रक्षाबंधनाचा हा सोहळा फक्त नात्याचा उत्सव नव्हे, तर एकमेकांच्या सुरक्षेची, विश्वासाची आणि कायमस्वरूपी साथ देण्याच्या वचनाची पुनःप्रत्ययाची जाणीव करून देणारा ठरला.
