🚩 रायगडावर मावळला स्वराज्याचा सूर्य… पण प्रत्येक मराठी हृदयात आजही तेजाने जिवंत आहेत छत्रपती शिवाजी महाराज

छावा डिजिटल मीडिया न्यूज पोर्टल, शुक्रवार ०३ एप्रिल २०२६

इ.स. १६८० चा तो दिवस…

         संपादकीय       

रायगडावर एक अजब शांतता पसरली होती. स्वराज्याचे संस्थापक, हिंदवी स्वराज्याचे स्वप्न साकार करणारे छत्रपती शिवाजी महाराज गंभीर अवस्थेत होते. संपूर्ण किल्ल्यावर चिंता पसरली होती. मावळे, सरदार, सेवक  सगळ्यांच्या मनात एकच प्रश्न होता… “महाराजांना काय झालं आहे? २३ मार्च १६८० रोजी महाराजांना विषमज्वरासारख्या एका भयंकर आजाराने गाठले. त्या दिवशी त्यांना प्रचंड ताप आला होता. राजवैद्यांकडून उपचार सुरू होते, पण प्रकृती दिवसेंदिवस खालावत चालली होती. शिवनेरी किल्ल्यावर जन्मलेला एक बालक…आई जिजाऊंच्या संस्कारांनी घडलेला…तोच पुढे स्वराज्याचा शिल्पकार ठरला. तोरणा जिंकून स्वराज्याची सुरुवात केली…अफजलखानाचा पराभव केला…शाईस्तेखानाला धडा शिकवला…आणि औरंगजेबाच्या कैदेतूनही धाडसानं सुटका केली. महाराज फक्त राजा नव्हते…ते होते रणनीतीकार, न्यायप्रिय शासक आणि लोकांच्या मनातले देव.

 ३ एप्रिल १६८० — तो वेदनादायी क्षण

चैत्र शुद्ध पौर्णिमा हनुमान जयंती दुपारचे सुमारे २ वाजले होते…रायगडाच्या दालनात महाराज आपल्या अखेरच्या क्षणांना सामोरे जात होते. त्या क्षणीही महाराजांचा आवाज शांत होता. त्यांनी आपल्या जवळच्या सरदारांना सांगितले तुम्ही सर्व बाहेर जा…कोणीही खचू नका…मृत्यू कोणालाही चुकत नाही…आता मी ईश्वराचे स्मरण करतो…सरदारांच्या डोळ्यांत अश्रू होते…पण महाराजांची आज्ञा मानून ते बाहेर पडू लागले. तो क्षण… जो इतिहास विसरू शकत नाही  दालनातून बाहेर पडताना प्रत्येक मावळ्याचे मन तुटत होते.डोळ्यांतून अश्रूंच्या धारा वाहत होत्या .त्या दिवशी रायगडावर स्वराज्याचा सूर्य मावळला.

 पण महाराज कधीच गेले नाहीत महाराज गेले नाहीत…ते आजही जिवंत आहेत प्रत्येक किल्ल्यात…प्रत्येक तलवारीत…प्रत्येक मराठी माणसाच्या रक्तात!त्यांचा विचार, त्यांची शिकवण, त्यांची स्वराज्याची ज्योत आजही तितक्याच तेजाने पेटलेली आहे.

रायगड शांत झाला…मावळे रडत राहिले…पण आजही प्रत्येक मराठी मनातून एकच आवाज घुमतो महाराज… तुम्ही गेले नाहीत…तुम्ही आमच्या रक्तात आहात!”

🚩 जय शिवराय!