🔴 सरकारी कामात अडथळा ठरला महागात! चौल येथे जमीन मोजणीदरम्यान अभियंत्यावर लाकडी पट्टीने हल्ला, एकाला अटक

• छावा डिजिटल मीडिया न्यूज पोर्टल
• ✍️ सचिन मयेकर
• 📅 बुधवार , २१ जानेवारी २६

रेवदंडा–साळाव ब्रिजच्या कामासाठी सुरू असलेल्या जमीन मोजणीदरम्यान ठेकेदार कर्मचारी याच्यावर थेट हल्ला झाल्याची धक्कादायक घटना मंगळवारी (दि. २०) चौल येथे उघडकीस आली आहे.

या प्रकरणी रेवदंडा पोलीस ठाण्यात गुन्हा दाखल करून एका आरोपीला अटक करण्यात आली असून, सरकारी कामात अडथळा आणणाऱ्यांविरोधात पोलिसांनी कडक भूमिका घेतली आहे.

दि. २० जानेवारी २०२६ रोजी सकाळी साडेदहा ते पावणे अकराच्या सुमारास चौल येथील रामेश्वर राईस मिलच्या पाठीमागील मोकळ्या जागेत रेवदंडा–साळाव ब्रिजसाठी आवश्यक असलेल्या जमीन मोजणीचे काम सुरू होते.यावेळी महाराष्ट्र शासनाच्या महाराष्ट्र राज्य रस्ते विकास महामंडळाकडून नियुक्त रोडिक कन्सलटंट प्रा. लि. (नवी दिल्ली) या कंपनीत कार्यरत अभियंता सुरेंद्र चंद्रभान सिंग (वय ३३) हे कामावर देखरेख करत होते.

अचानक हल्ला, लाकडी पट्टीने मारहाण

याच दरम्यान आरोपी मोहसीन अहमद तांडेल व मुफेज मोहसीन तांडेल (दोघे रा. रेवदंडा) हे घटनास्थळी आले.

“आपल्या जागेत का आलात?” या कारणावरून त्यांनी वाद घातला. वादाचे रूपांतर थेट हल्ल्यात झाले.आरोपी क्र. २ ने अभियंत्यावर लाकडी पट्टीने मारहाण केली,तर दोघांनी मिळून शिवीगाळ, दमदाटी करत जीवे मारण्याची धमकी दिल्याचा आरोप फिर्यादीने केला आहे.

सरकारी कामात अडथळा, गुन्हा दाखल

या घटनेनंतर रेवदंडा पोलीस ठाण्यात गु.र.नं. १०/२०२६ भा.न्या.सं. कलम १२१(१), १३२, ३५२, ३५१(२), ३(५) अंतर्गत गुन्हा दाखल करण्यात आला.पोलिसांनी तत्काळ कारवाई करत आरोपी मुफेज मोहसीन तांडेल याला सायंकाळी ७ वाजता अटक केली आहे.इतर आरोपीविरोधातही पुढील तपास सुरू आहे.

घटनेमुळे रेवदंडा–चौल परिसरात खळबळ उडाली असून, विकासकामांच्या सुरक्षेचा मुद्दा पुन्हा ऐरणीवर आला आहे.