🔴 रेवदंडा मोठा कोळीवाडा बायपास प्रकल्पाविरोधात ग्रामस्थ आक्रमक 🛑 योग्य पुनर्वसन व नुकसानभरपाईशिवाय घर खाली न करण्याचा ठाम इशारा

• छावा डिजिटल मीडिया न्यूज पोर्टल
• ✍️ सचिन मयेकर
• 📅 गुरुवार , ८ जानेवारी २६

रेवदंडा मोठा कोळीवाडा परिसरात सुरू असलेल्या बायपास रस्ता व पुलाच्या प्रकल्पामुळे स्थानिक ग्रामस्थांमध्ये तीव्र असंतोष पसरला आहे. अनेक वर्षांपासून वास्तव्यास असलेली घरे या प्रकल्पामुळे बाधित होण्याची शक्यता असून, अद्याप शासनाकडून कोणतेही ठोस पुनर्वसन धोरण किंवा नुकसानभरपाई जाहीर करण्यात आलेली नाही, अशी तीव्र नाराजी ग्रामस्थांकडून व्यक्त केली जात आहे.

सदर परिसरात अलीकडे मोजणी करण्यात आली असून, काही ठिकाणी लाल झेंडे लावण्यात आले आहेत. त्यामुळे नागरिकांमध्ये भीतीचे वातावरण निर्माण झाले आहे. “या संदर्भात ग्रामस्थांकडून असंख्य सह्यांचे लेखी अर्ज स्थानिक प्रशासनाकडे सादर करण्यात आला आहें.

लहान मुले व वृद्धांच्या सुरक्षिततेचा गंभीर प्रश्न

या मार्गावरून मोठ्या प्रमाणात अवजड वाहने सुरू झाल्याने लहान मुले व वृद्ध नागरिकांना शारीरिक तसेच मानसिक त्रास सहन करावा लागत आहे. अपघाताचा धोका वाढला असून, याबाबत शासनाने तातडीने उपाययोजना कराव्यात, अशी मागणी होत आहे.

शासनाला थेट इशारा

जर बाधित घरांचे योग्य पुनर्वसन, पर्यायी घरे व योग्य अनुदान तात्काळ जाहीर करण्यात आले नाही, तर संबंधित रस्ता किंवा पुलाचा मार्ग बदलण्यात यावा अन्यथा ग्रामस्थ लोकशाही मार्गाने तीव्र आंदोलन छेडतील असा ठाम इशारा देण्यात आला आहे.

 विकास हवा, पण अन्याय नको

“विकासाच्या नावाखाली स्थानिक नागरिकांना बेघर करणे मान्य नाही. आधी पुनर्वसन, मग प्रकल्प,” अशी स्पष्ट भूमिका ग्रामस्थांनी मांडली आहे.