🔴 कुलूप अखंड, दार न फोडता घर साफ! चावीच बनली चोरीची ‘किल्ली’ — घरच्याच नात्यातून ₹2.76 लाखांचा ऐवज लंपास

• छावा डिजिटल मीडिया न्यूज पोर्टल
• ✍️ सचिन मयेकर
• 📅 बुधवार , २४ डिसेंबर २०२५

विश्वास, नातेसंबंध आणि घरगुती सुरक्षिततेलाच हादरा देणारी धक्कादायक चोरीची घटना रेवदंडा पोलीस ठाणे हद्दीत उघडकीस आली असून, कुलूप न फोडता चावीच्या आधारे घरात प्रवेश करून तब्बल ₹२ लाख ७६ हजार रुपयांचा ऐवज लंपास करण्यात आल्याने परिसरात खळबळ उडाली आहे. या प्रकरणात घरच्याच जवळच्या नात्यातील व्यक्तीवर संशयाची सुई रोखली जात आहे.

महाजने, ता. अलिबाग येथील सौ. अरुणा किसन जाधव (वय ५१) यांच्या घरात ही चोरी घडली. दि. २३ जुलै २०२५ सकाळी ९ वाजल्यापासून ते १६ नोव्हेंबर २०२५ दुपारी ३.३० वाजेपर्यंतच्या कालावधीत, घराचा मुख्य दरवाजा बाहेरून कुलूप लावून बंद असतानाही कुठलीही तोडफोड न करता घर उघडण्यात आले आणि घरातील मौल्यवान ऐवज गायब झाला. नंतर तपासात उघड झाले की, घराची चावी फिर्यादींचे पती किसन जाधव यांनी विश्वासाने आपल्या सख्ख्या पुतण्या संघर्ष नंदकुमार जाधव याच्याकडे दिली होती. हीच चावी संघर्षने आपल्या दुचाकीच्या चावीला लावून ठेवली होती.

 या माहितीचा गैरवापर करत कोणीतरी  चोरट्याने कुलूप न फोडता चावीनेच घराचा मुख्य दरवाजा उघडण्यात आला आणि फिर्यादींची कोणतीही संमती नसताना, स्वतःच्या फायद्यासाठी घरातील सोन्याचे दागिने, रोख रक्कम, पितळ-तांब्याची भांडी तसेच नवे कपडे असा मोठा मुद्देमाल चोरून नेण्यात आला.

चोरीस गेलेल्या ऐवजात सुमारे ₹३९,००० किंमतीचा सोन्याचा हार, ₹४२,००० किंमतीच्या दोन सोन्याच्या अंगठ्या, ₹७५,००० किंमतीच्या पाच सोन्याच्या अंगठ्या, ₹९०,००० रोख रक्कम, ₹२५,००० किंमतीची घरगुती धातूची भांडी आणि ₹६५,००० किंमतीचे नवे कपडे यांचा समावेश असून, एकूण चोरीचा ऐवज ₹२,७६,०००/- इतका आहे. या प्रकरणात अद्याप कोणताही मुद्देमाल हस्तगत झालेला नाही.

या गंभीर चोरीप्रकरणी रेवदंडा पोलीस ठाण्यात गुन्हा रजि. नं. १९९/२०२५ अन्वये भारतीय न्याय संहिता २०२३ चे कलम ३०५(अ) अंतर्गत गुन्हा दाखल करण्यात आला असून, या कलमान्वये ७ वर्षांपर्यंत शिक्षेची तरतूद आहे. कुलूप, चावी, घटनास्थळ तसेच दुचाकीचा थेट संबंध असल्याने फॉरेन्सिक एक्सपर्ट टीममार्फत शास्त्रीय तपास करण्याची मागणी पुढे येत आहे.

कुलूप अखंड असताना, घरातीलच चावीचा वापर करून झालेली ही चोरी “बाहेरचा चोर नाही, आतलाच घाव” हेच अधोरेखित करत असून, आता या प्रकरणात पोलीस तपासातून नेमकं सत्य कधी उघड होणार, चोरीचा ऐवज कधी सापडणार आणि दोषी कोण ठरणार—याकडे संपूर्ण परिसराचे लक्ष लागले आहे

पुढील तपास पोलीस उपनिरीक्षक एन आर आंगज हे करीत आहेत.