🔴 आठ दिवस उलटले तरी बिबट्या मोकाटच 🔴 अक्षी–साखर दहशतीत; बैठका झाल्या, पण प्रत्यक्षात उपाय कुठे? 🔴 प्रशासनाच्या कार्यक्षमतेवर गंभीर प्रश्नचिन्ह

छावा डिजिटल न्यूज पोर्टल – सचिन मयेकर —रायगड, गुरुवार —१८ डिसेंबर २०२५

आक्षी –साखर परिसरात गेल्या आठ दिवसांपासून बिबट्याचा मुक्त संचार सुरू असून, अद्याप त्याला पकडण्यात यश न आल्याने संपूर्ण परिसरात भीतीचे वातावरण निर्माण झाले आहे. बिबट्याच्या हल्ल्यांच्या पार्श्वभूमीवर नागरिक जीव मुठीत धरून दैनंदिन व्यवहार करत असून, शाळा बंद ठेवण्याची वेळ आली, पर्यटन व मच्छीमारी व्यवसायावरही मोठा परिणाम झाला आहे.

या गंभीर परिस्थितीवर तोडगा काढण्यासाठी जिल्हाधिकारी किशन जावळे यांच्या अध्यक्षतेखाली बैठक झाली, मात्र बैठकांपुरतेच निर्णय मर्यादित राहिले की काय, असा प्रश्न आता स्थानिक ग्रामस्थ उपस्थित करत आहेत. कारण प्रत्यक्षात घटनास्थळी बिबट्या अजूनही मोकाट आहे, आणि भीती तशीच कायम आहे.

👉 “बैठका झाल्या, पण प्रत्यक्षात साधनसामग्रीच नाही?”

वनविभागाच्या कामकाजाबाबत समोर येणारी माहिती अधिकच चिंताजनक आहे.रायगड व ठाणे जिल्ह्यातील वनविभागाकडे पुरेसे पिंजरे नाहीत,पिंजरे वाहून नेण्यासाठी वाहने अपुरी,बिबट्याला बेशुद्ध करण्यासाठी लागणाऱ्या गन्सचा तुटवडा,तसेच तज्ज्ञ डॉक्टर आणि मनुष्यबळाची कमतरताअशी परिस्थिती असल्याचे वास्तव समोर येत आहे. पिंजरे मिळाले तरी ते दुसऱ्या ठिकाणाहून मागवावे लागतात, अनेकदा अधिकाऱ्यांना खासगी मदतीवर अवलंबून राहावे लागते. ग्रामस्थ भयभीत; रोजगारावरही परिणाम आक्षी –साखर परिसरातील नागरिकांमध्ये प्रचंड भीती असून, महिला, लहान मुले आणि वृद्धांची सुरक्षितता हा गंभीर प्रश्न बनला आहे. विशेषतः मच्छीमारी व्यवसाय करणाऱ्या कुटुंबांवर याचा थेट आर्थिक फटका बसत आहे.बिबट्या कधी कुठून येईल, याचा भरोसा नाही, अशी भावना ग्रामस्थांमधून व्यक्त होत आहे.

👉 अतिक्रमण, अधिवास नष्ट आणि परिणाम सामान्यांवर

वनजमिनीवरील वाढते अतिक्रमण, सिमेंट-काँक्रिटचे वाढते जाळे आणि नैसर्गिक अधिवासांचा ऱ्हास यामुळे वन्यप्राणी गावांकडे येत असल्याचे चित्र आहे. मात्र याचा फटका मात्र सामान्य नागरिकांना बसत असून, प्रशासनाकडे पुरेशा तयारीचा अभाव असल्याचे वास्तव परिस्थिती अधोरेखित करत आहे.

👉 प्रश्न अनुत्तरितच

आठ दिवस उलटूनही बिबट्या का पकडला गेला नाही?

बैठका झाल्यानंतर प्रत्यक्षात कोणती ठोस कृती झाली?

वनविभागाकडे आवश्यक साधनसामग्री कधी उपलब्ध होणार?

हे प्रश्न आता अक्षी–साखर परिसरातील नागरिक खुलेपणाने विचारू लागले आहेत.ही परिस्थिती पाहता मानव–वन्यजीव संघर्ष रोखण्यासाठी केवळ बैठका नव्हे, तर तातडीची, सक्षम आणि प्रत्यक्षात परिणामकारक कारवाई आवश्यक असल्याची भावना व्यक्त केली जात आहे. ही बातमी स्थानिक नागरिकांच्या प्रतिक्रिया, घटनास्थळी दिसून आलेली परिस्थिती आणि उपलब्ध अधिकृत माहितीनुसार तयार करण्यात आली आहे. प्रशासनाकडून यावर पुढील भूमिका अपेक्षित आहे.