🔱 हरेश्वर मंदिरात कालभैरव उत्सवाची भक्तिमय झळाळी रेवदंडा दुमदुमला जयघोषाने

रेवदंडा येथील गोळा स्टॉप जवळील काळभैरव मंदिरात दरवर्षीप्रमाणे यंदाही सार्वजनिक श्री काळभैरव उत्सव मोठ्या भक्तिभाव, उत्साह आणि पारंपरिक रंगतदार वातावरणात बुधवार, दि. १२ नोव्हेंबर २०२५ रोजी मोठ्या जल्लोषात संपन्न झाला.

छावा डिजिटल न्यूज पोर्टल — सचिन मयेकर — गुरुवार – १३ नोव्हेंबर २०२५

उत्सवाच्या निमित्ताने सकाळपासूनच मंदिर परिसरात भक्तांची मोठी गर्दी होती. सायं. ५.०० वा. सुप्रसिद्ध कीर्तनकार ह.भ.प. आठवले बुवा यांच्या प्रभावी आणि भावस्पर्शी कीर्तनाने कार्यक्रमाची सुरुवात झाली. त्यांच्या कीर्तनातील ओवी आणि कथा श्रवण करताना भाविक मंत्रमुग्ध झाले. त्यानंतर पारंपरिक विधीपूर्वक जन्मकाळाचा सोहळा भक्तिमय वातावरणात साजरा झाला.

या कार्यक्रमात रात्री ७. ०० वाजता श्री महाकाली प्रासादिक भजन मंडळ रेवदंडा यांनी सादर केलेल्या भक्तिगीतांनी वातावरण अधिकच भारले. रात्री ९.०० वाजता ज्ञानेश्वरी भजन मंडळ, सातारा यांच्या भारूड कार्यक्रमाने उत्सवाला भक्तिरसाची परमोच्च उंची प्राप्त झाली. त्यांच्या सादरीकरणात भाव, अध्यात्म यांचा अप्रतिम संगम दिसून आला. संध्याकाळी सहा ते रात्री नऊ या वेळेत महाप्रसादाचे आयोजन करण्यात आले होते या प्रसंगी हजारोच्या संख्येने गावातील तसेच परिसरातील भाविकांनी उपस्थित राहून महाप्रसादाचा लाभ घेतला.

उत्सवाच्या निमित्ताने हरेश्वर मंदिरात भव्य रांगोळी प्रदर्शन भरविण्यात आले होते. या प्रदर्शनाचे उद्घाटन वैष्णवी कन्स्ट्रक्शन अँड डेव्हलपर्सचे मालक तसेच रेवदंडा ग्रुप ग्रामपंचायत सदस्य श्री. संतोष मोरे यांच्या हस्ते करण्यात आले.

या प्रदर्शनात एकापेक्षा एक सुंदर, जिवंत भासणाऱ्या रांगोळ्या स्थानिक कलाकारांनी साकारल्या होत्या. रंगांच्या अप्रतिम संगतीतून उभ्या राहिलेल्या या कलाकृतींनी भाविकांचे लक्ष वेधून घेतले आणि सर्वांची वाहवा मिळवली.

दिवसभरात उत्सवाला पूरक अशा फनी गेम्स, संगीत खुर्ची, रांगोळी स्पर्धा आणि भारूड कार्यक्रमाचे आयोजन करण्यात आले होते. या स्पर्धांना महिलांनी मोठ्या उत्साहाने प्रतिसाद दिला.

संगीत खुर्ची स्पर्धेत प्रथम क्रमांक माधुरी शाम पाटील, द्वितीय क्रमांक माधुरी चुनेकर आणि तृतीय क्रमांक नीलम भगवान तांबडकर यांनी पटकावला. विजेत्या तिघींना उपस्थित मान्यवरांच्या हस्ते पैठणी बक्षीस प्रदान करण्यात आले.

या कार्यक्रमास रेवदंडा ग्रामपंचायतीचे सरपंच श्री. प्रफुल्ल मोरे व त्यांची पत्नी सौ. भारती मोरे यांची विशेष हजेरी लागली.

पंच कमिटी पदाधिकारी पुढीलप्रमाणे —

अध्यक्ष : वैभव चुनेकर

उपाध्यक्ष : भगवान तांबडकर

सेक्रेटरी : किरण चुनेकर

सहसेक्रेटरी : वैभव नाईक

खजिनदार : सुरेंद्र गोंधळी

सदस्य : अंजनकुमार तांबडकर, राजेश चुनेकर, अमित नाईक, मिलिंद चुनेकर

सल्लागार : शरद गोंधळी, तुकाराम चुनेकर, यशवंत पिटनाईक