📰 रोजा ठेवूनही विद्यार्थ्यांसोबत उभ्या; जिंदाल विद्या मंदिराची MuSo म्युझियम ट्रिप ठरली प्रेरणादायी

छावा डिजिटल मीडिया न्यूज पोर्टल ✍ सचिन मयेकर मंगळवार १७ मार्च २०२६

 जिंदाल विद्या मंदिरातील विद्यार्थ्यांसाठी आयोजित करण्यात आलेली मुंबई येथील Museum of Solutions (MuSo) येथील शैक्षणिक ट्रिप विद्यार्थ्यांसाठी एक संस्मरणीय आणि ज्ञानवर्धक अनुभव ठरली.

सकाळी साडेसातच्या सुमारास शाळेतून प्रस्थान करून विद्यार्थ्यांनी दिवसभर म्युझियममधील विविध विज्ञानाधारित उपक्रमांचा आनंद घेतला. MuSo म्युझियममध्ये मुलांना हाताने करून शिकण्याच्या, सर्जनशीलता वाढवणाऱ्या आणि समस्या सोडवण्याच्या कौशल्यांचा प्रत्यक्ष अनुभव मिळाला. ही ट्रिप पूर्णपणे मोफत असून विद्यार्थ्यांच्या खाण्यापिण्याची तसेच सुरक्षिततेची उत्तम व्यवस्था करण्यात आली होती. या संपूर्ण ट्रिपदरम्यान सर्व शिक्षकांनी विद्यार्थ्यांचा अत्यंत दक्षतेने आणि प्रेमळपणे सांभाळ केला. प्रवासापासून ते म्युझियममधील प्रत्येक उपक्रमापर्यंत विद्यार्थ्यांची सुरक्षितता, शिस्त आणि सोयी याकडे विशेष लक्ष देण्यात आले. प्रत्येक विद्यार्थ्याची काळजी घेत ही ट्रिप यशस्वी करण्यासाठी शिक्षकांनी महत्त्वाची भूमिका बजावली.

विशेष म्हणजे, रमजानचा पवित्र महिना सुरू असतानाही काही महिला शिक्षिका आणि विद्यार्थी उपवास (रोजा) पाळत असतानाही ट्रिपमध्ये सहभागी झाले होते. उपवासाच्या अवस्थेतही त्यांनी विद्यार्थ्यांसोबत पूर्ण वेळ राहून त्यांना मार्गदर्शन केले आणि सांभाळले.

मुंबईतील MuSo म्युझियम ट्रिपदरम्यान रोजा ठेवूनही विद्यार्थ्यांसोबत पूर्ण वेळ उभ्या राहिलेल्या या शिक्षकांबद्दल सर्वत्र कौतुक व्यक्त होत आहे. स्वतः उपवासात असतानाही मुलांच्या सुरक्षिततेची, आनंदाची आणि शिक्षणाची जबाबदारी त्यांनी अत्यंत समर्पणाने पार पाडली.

या ट्रिपमधून विद्यार्थ्यांनी फक्त म्युझियमच पाहिलं नाही, तर

👉 कर्तव्य, समर्पण आणि माणुसकीचा जिवंत धडा अनुभवला.

अशा शिक्षकांमुळेच विद्यार्थ्यांच्या मनात चांगले संस्कार रुजतात आणि शिक्षण अधिक अर्थपूर्ण बनते.

👉 छावा तर्फे अशा समर्पित मुस्लिम शिक्षकांना सलाम… ईद मुबारक! 🌙