🎬 छावा Filmfare कधी लोक हसायचे… पण मेहनत आणि श्रमांनी नावच ब्रँड बनलं ओमकार काटले

टीप : छावा Filmfare मधील हा विशेष लेख शुक्रवारी प्रकाशित होणार होता. मात्र काही अपरिहार्य कारणांमुळे तो त्या दिवशी प्रसिद्ध करता आला नाही. त्यामुळे हा लेख आज शनिवारी वाचकांसमोर सादर करण्यात येत आहे.

छावा डिजिटल मीडिया न्यूज पोर्टल ✍ सचिन मयेकर, रेवदंडा शनिवार ०७ मार्च २०२६

एखाद्या कलाकाराचा प्रवास नेहमी मोठ्या मंचावरून सुरू होत नाही. कधी तो एखाद्या छोट्या गावातून, मंदिरातील भजनातून आणि मनातल्या एका साध्या आवडीपासून सुरू होतो.

असाच जिद्दीचा आणि मेहनतीचा प्रवास आहे ओमकार नरेश काटले या तरुण संगीतकाराचा.

अलिबाग परिसरातील साध्या कुटुंबात वाढलेला ओमकार शिक्षणाने दहावीपर्यंत शिकलेला. पण लहानपणापासूनच त्याच्या मनात संगीताची ओढ होती. त्यांच्या गावातील राधाकृष्ण हरी कृष्ण मंदिरात भजन-कीर्तन होत असे. ओमकारचे आजोबा त्याला लहानपणी त्या भजनासाठी घेऊन जात. मंदिरातील टाळ-मृदुंगाचे सूर, भजनातील भक्तीभाव आणि त्या वातावरणातील संगीत… इथूनच त्याच्या मनात गाण्याची आवड निर्माण झाली.

सुरुवातीला तो छोट्या छोट्या कार्यक्रमांमधून गाणी करायला लागला. हळूहळू स्वतः गाणी तयार करून लोकांपर्यंत पोहोचवू लागला. आज अनेक गाण्यांचा निर्माता म्हणून त्याची एक ओळख निर्माण होत आहे.

त्याच्या प्रवासातील पहिलं विशेष गाणं होतं नागावचे माजी सरपंच निखिल मयेकर यांच्या जीवनावर आधारित. त्या गाण्याने स्थानिक पातळीवर त्याला एक वेगळी ओळख मिळवून दिली.

ओमकारचे आई-वडील प्रामुख्याने शेती करणारे साधे शेतकरी. पण मुलाच्या कलेवर त्यांचा पूर्ण विश्वास आहे. ओमकार सांगतो, माझ्या आई-वडिलांनी नेहमी मला साथ दिली. त्यांचा आशीर्वाद आणि विश्वास हेच माझ्यासाठी मोठं बळ आहे. त्याच्या प्रवासात प्रेरणा देणाऱ्या व्यक्तींमध्ये संतोष सदाशिव मोरे म्हणजेच बाबूभाई मोरे यांचा विशेष उल्लेख तो करतो. ओमकारच्या कलेतील गुणवत्ता ओळखून त्यांनी त्याला वडिलांसारखी साथ दिली. तसेच त्याचा जवळचा मित्र जीवन पवार गेली अनेक वर्ष त्याच्या पाठीशी उभा आहे. पण हा प्रवास इतका सोपा नव्हता. सुरुवातीला जेव्हा त्याने गाण्याचे कार्यक्रम सुरू केले तेव्हा अनेक लोक त्याची टिंगल करायचे. हा काय गावठी मुलगा गाणं करणार? असे शब्द त्याला ऐकावे लागले. परंतु त्या टिंगल-टवाळीने त्याची जिद्द कमी झाली नाही. उलट त्याने मेहनत, श्रम आणि सातत्य यांच्यावर विश्वास ठेवला. आज परिस्थिती बदलली आहे. ज्या लोकांनी कधी त्याची चेष्टा केली होती, तेच लोक आज त्याला कार्यक्रमासाठी बोलावतात. ओमकार सांगतो की त्याच्या या प्रवासात त्याच्या कुटुंबाने, मित्रांनी आणि गावकऱ्यांनी शंभर टक्के साथ दिली. त्यामुळेच त्याची ही वाटचाल अधिक मजबूत झाली. भविष्यासाठीही त्याची स्वप्नं मोठी आहेत. संगीताच्या क्षेत्रात स्वतःची वेगळी ओळख निर्माण करत पुढेही नवनवीन गाणी तयार करण्याची त्याची इच्छा आहे. चांगले गायक आणि कलाकार मिळाले तर आणखी मोठ्या पातळीवर काम करण्याचं त्याचं स्वप्न आहे. आजही तो त्या मंदिरातील भजनाची आठवण काढतो… जिथे त्याच्या आयुष्यातील पहिला सूर उमटला होता.

कधी लोक हसायचे… पण आज त्याच मेहनतीने आणि श्रमांनी “ओमकार काटले” हे नावच एक ब्रँड बनत चाललं आहे.