🎉 नववर्ष स्वागतासाठी रायगड सज्ज – जड व अवजड वाहनांना ३१ डिसेंबर ते १ जानेवारीपर्यंत वाहतूक बंदी

• छावाडिजिटल  मीडिया न्यूज पोर्टल
• ✍️ सचिन मयेकर
• 📅 मंगळवार , 30 डिसेंबर २५

रायगड जिल्ह्यात नववर्षाच्या स्वागतासाठी पर्यटकांची मोठ्या प्रमाणावर गर्दी होण्याची शक्यता प्रशासनाने व्यक्त केली आहे. त्यामुळे वाहतूक कोंडी टाळून नागरिक व पर्यटकांच्या प्रवासाला सुरक्षित व सुगम बनवण्यासाठी जिल्हाधिकारी किशन जावळे यांनी महत्त्वाचा आदेश जारी केला आहे. या निर्णयानुसार ३१ डिसेंबर २०२५ रोजी सकाळी ८.०० वाजल्यापासून ते ०१ जानेवारी २०२६ रोजी रात्री १२.०० वाजेपर्यंत रायगड जिल्ह्यातील प्रमुख राष्ट्रीय व राज्य महामार्गांवर जड व अवजड वाहनांना वाहतूक बंदी लागू राहणार आहे. रायगड हा पर्यटनाचा प्रमुख जिल्हा असल्याने वर्षअखेरीस अलिबाग, किहीम, आक्षी, नागाव, रेवदंडा, काशिद, मुरूड, दिवेआगर, श्रीवर्धन, हरिहरेश्वर, महाड, कर्जत, माथेरान, खालापूर, इमॅजिका, पाली, रायगड किल्ला अशा समुद्रकिनाऱ्यांपासून किल्ल्यांपर्यंत मोठ्या प्रमाणावर पर्यटक दाखल होतात. नाताळ व वर्षअखेरीच्या सुट्ट्यांमुळे या संख्येत आणखी वाढ अपेक्षित असल्याने महामार्गांवर ताण निर्माण होऊ शकतो. या गर्दी व वाहतूक ताणाचा विचार करून वाहतुकीत शिस्त राखण्यासाठी ही मोठी पावले उचलण्यात आली आहेत. बंदी दरम्यान हे मार्ग विशेषत्वाने प्रभावित राहतील— खारपाडा ते कशेडी (मुंबई–गोवा महामार्ग क्र. ६६), माणगांव–ताम्हाणी घाटमार्गे दिघी (रा.मा. ७५३-फ), कर्जत–पळसदरी–खोपोली–पालीफाटा–वाकण (रा.मा. ५८४-अ), वडखळ–अलिबाग (रा.मा. १६६-अ), चौकफाटा–कर्जत राज्यमार्ग, अलिबाग–मुरुड राज्यमार्ग, अलिबाग–मांडवा मार्ग व इतर पर्यटन मार्गांवर जड वाहनांची वाहतूक थांबवण्यात येणार आहे.दरम्यान, जीवनावश्यक सेवा वाहनांना बंदीतून सवलत देण्यात आली आहे. यामध्ये दूध, पेट्रोल, डिझेल, स्वयंपाकाचा गॅस, औषधे, ऑक्सिजन, भाजीपाला व पाणी पुरवठा करणारी वाहने तसेच पोलीस, अग्निशमन दलाची वाहने व रुग्णवाहिका यांना सूट राहील. प्रशासनाने वाहनचालकांनी पर्यायी मार्गांचे नियोजन करून वाहतूक नियंत्रणाला सहकार्य करण्याचे आवाहन केले आहे.सारांश असा की, नववर्षाच्या कालावधीत वाढणारी गर्दी, समुद्रकिनारी व पर्यटनस्थळी होणारी वाढलेली वर्दळ लक्षात घेता सुरक्षितता, अपघातसंयम व वाहतुकीतील सुटसुटीतपणा साधण्यासाठी जिल्हा प्रशासनाकडून हा निर्णय घेतला गेला असून रायगड नववर्षासाठी सज्ज झाला आहे.