🎅 भेट — एका बापाच्या प्रेमाची कथा (Christmas Special)

Disclaimer: ही कथा काल्पनिक (Fiction) आहे. Santa Claus चा खरा इतिहास वेगळा असला तरी ही कथा सणातील प्रेम, दान आणि वाटण्याचा संदेश देण्यासाठी लिहिलेली आहे.

• छावा डिजिटल मीडिया न्यूज पोर्टल
• ✍️ सचिन मयेकर
• 📅 गुरुवार , २५ डिसेंबर २५

एका छोट्या घरात एक बाप आणि त्याची गोड मुलगी राहत होती. संसार श्रीमंत नव्हता, पण त्या दोघांच्या नात्यात जगातील सर्वात मोठा आनंद होता. बाप रोज मेहनत करत असे आणि मिळालेल्या पैशातून मुलीसाठी छोटे छोटे खेळणे घेऊन येत असे. मुलगीही त्याच्याकडे पाहताच चमकून हसत असे, नवे खेळणे हातात घेताच तिच्या डोळ्यांत लखलख झळकायची. घरात रात्री चांदणं असेल तसं तिचं हसू पसरलेलं असायचं. पण आयुष्य कधी बदलतं ते कळतही नाही. एक दिवस मुलगी आजारी पडली. साधी सर्दी वाटली, पण आजार वाढतच गेला, तिचं हसू मंदावलं आणि बोलणं कमी झालं. बाप तिच्या शेजारी बसून रात्रभर जागत राहायचा. औषधं, डॉक्टर, प्रार्थना  काहीच उपयोग होत नव्हता. एका रात्री मुलगी बाबाचा हात घट्ट धरून मंद आवाजात म्हणाली, “बाबा… मी झोपते. उद्या सकाळी उठल्यावर तू मला नवं खेळणं द्यायचं. माझ्या उशीजवळ ठेव. मी पाहीन आणि तुला हसेन…” बापाच्या डोळ्यांत अश्रू दाटले, पण त्याने स्मित करून मान हलवली. दुसऱ्या दिवशी अक्षरशः धावत जाऊन त्याने मुलीसाठी सुंदर खेळणं आणलंच, आणि झोपलेल्या मुलीजवळ अलगद ठेवून बसला. सकाळ उजाडली, सूर्य आला, पण ती उठलीच नाही. उशीजवळचं नवं खेळणं तिच्या शांत चेहऱ्याशेजारी पडून राहिलं आणि त्या बापाचा संसार त्या क्षणी निराधार झाला. सर्व काही थांबलं. घर शांत… पण त्या शांततेत तुटलेलं एक हृदय. तो दिवस होता  २५ डिसेंबर. त्या दिवसापासून त्या माणसाने ठरवलं की माझ्या मुलीला भेट पाहायला मिळाली नाही, त्यामुळे आता प्रत्येक मुलाच्या चेहऱ्यावर हसू आणणारा बाबा मी बनेन. आणि मग त्याने खेळणी, मिठाई, भेटवस्तू खरेदी करून अनाथ, गरीब, निराधार मुलांमध्ये वाटू लागला. मुलांच्या हसण्यात त्याला स्वतःची मुलगी दिसायची, त्यांच्या आनंदात तो तिचा श्वास ऐकायचा. हळूहळू लोक त्याला “Santa” म्हणू लागले  प्रेम, दान आणि हसू वाटण्याचा प्रतीक. भेटवस्तू म्हणजे वस्तू नाहीत, ती एखाद्याच्या चेहऱ्यावर आणलेली आनंदाची चांदणी आहे. ख्रिसमस हा फक्त उत्सव नाही, तो प्रेम देण्याचा, हसू वाटण्याचा, कोणाचातरी सांता बनण्याचा दिवस आहे. कदाचित एखादं छोटंसं खेळणं, मिठाई किंवा ऊबदार शब्द कुणासाठी संपूर्ण जग ठरू शकतात. चला, या २५ डिसेंबरला आपणही कोणाचातरी सांता बनू या. कदाचित आपल्या कृतीने कोणाच्या आयुष्यात एक नवीन सकाळ उजाडेल.