रेवदंडा व परिसरात सर्दी-खोकल्याचा त्रास ; ताप व घशात खवखव वाढली
- छावा डिजिटल मीडिया न्यूज पोर्टल
- ✍️ सचिन मयेकर
- 📅 शुक्रवार , २ जानेवारी २६
रेवदंडा │ थंडीचा जोर वाढू लागल्याने रेवदंडा व परिसरात सर्दी-खोकला आणि घशात खवखव याची साथ जाणवू लागली आहे. अनेक कुटुंबांत एकानंतर एक सदस्य आजारी पडत असून घसा दुखणे, नाक चोंदणे, कोरडा खोकला, अंगदुखी आणि सौम्य ताप अशी लक्षणे नागरिकांना त्रास देत असल्याचे चित्र आहे. काही घरांत दोन ते तीन जण एकाच वेळी आजारी पडल्याचेही दिसून येत आहे.
गेल्या काही दिवसांत सकाळ व रात्री गारवा वाढलेला असून दुपारच्या वेळेस तापमानात बदल जाणवत आहे. या सतत बदलणाऱ्या हवामानाचा थेट परिणाम घसा व श्वसनमार्गावर होत असून त्यामुळे सर्दी-खोकल्याचे प्रमाण वाढत असल्याची माहिती वैद्यकीय क्षेत्रातून मिळते. लहान मुले व ज्येष्ठ नागरिक यांना याचा अधिक त्रास होत असून अनेक जण घरीच औषधोपचार, वाफ आणि गरम पाण्याचा आधार घेत आहेत.
स्थानिक दवाखान्यांमध्ये सर्दी-खोकला आणि तापाच्या रुग्णांची संख्या वाढली असून औषधांच्या मागणीतही वाढ झाल्याचे दिसून येते. काही रुग्णांमध्ये खोकला दीर्घकाळ टिकत असून घशात जळजळ, आवाज बसणे आणि थकवा जाणवण्याच्या तक्रारी समोर येत आहेत.
डॉक्टरांच्या माहितीनुसार थंड पेयांचे सेवन, धूळ आणि अचानक तापमान बदल यामुळे या आजारांची तीव्रता वाढू शकते. सर्दी-खोकल्याची लक्षणे चार-पाच दिवसांपेक्षा अधिक काळ टिकल्यास किंवा ताप वाढत असल्यास वैद्यकीय तपासणी आवश्यक असल्याचे मत तज्ज्ञांनी व्यक्त केले आहे. थंडीचा हंगाम सुरू असल्याने पुढील काही दिवस अशीच स्थिती राहण्याची शक्यता वर्तवली जात आहे.
