बॉबी’ – जेव्हा प्रेमकथेचा चेहरा बदलला!
छावा, संपादकीय | दि. २१ जुलै (सचिन मयेकर)
२१ जुलै १९७३ – हा केवळ एका चित्रपटाचा प्रदर्शनदिवस नव्हता, तर एक नवा सांस्कृतिक अध्याय सुरू होण्याचा क्षण होता. कारण याच दिवशी प्रदर्शित झाला होता दिग्दर्शक राज कपूर यांचा गाजलेला चित्रपट ‘बॉबी’, ज्याने केवळ बॉक्स ऑफिसवरच नव्हे, तर प्रेक्षकांच्या हृदयावरही अधिराज्य गाजवलं.
बॉबी हा चित्रपट अनेक कारणांनी ऐतिहासिक ठरतो. राज कपूर यांनी स्वतःचा मुलगा ऋषी कपूर याला नायक म्हणून लाँच केलं आणि त्याच्या समोर होती १६ वर्षीय डिंपल कपाडिया — तिचा हा पहिलाच चित्रपट होता. परंतु पहिलाच प्रयत्न असतानाही या दोघांची केमिस्ट्री इतकी जबरदस्त होती की प्रेक्षक अक्षरशः मंत्रमुग्ध झाले.
चित्रपटाची कथा एकदम साधी होती, पण त्यामागे सामाजिक जाणीवा होत्या. एका श्रीमंत उद्योगपतीचा मुलगा राजा आणि एका गरीब ख्रिश्चन मुलगी बॉबी — ही अमीर-गरीब, धर्म आणि जातीच्या भिंती ओलांडणारी प्रेमकहाणी होती. आजच्या भाषेत सांगायचं तर, ‘बॉबी’ने त्या काळी सोशल रिबेलिअन आणि युथ एक्सप्रेशन यांना पर्द्यावर आवाज दिला होता.
या चित्रपटातील गाणी आजही तितकीच गाजतात. मैं शायर तो नहीं, हम तुम एक कमरे में बंद हो, आणि झूठ बोले कौवा काटे… यांसारखी गाणी अजूनही प्रत्येक पिढीला मोहवतात. लक्ष्मीकांत–प्यारेलाल यांचं संगीत, गुलजार आणि इतर गीतकारांचं लेखन, आणि लता–किशोरच्या आवाजाने ही गाणी अमर झाली.
