अमेरिकेची युद्धनौका इराणजवळ, ३१ विमानंही तैनात; युद्धात उतरण्याची तयारी? वेगवान घडामोडी

Israel Iran News: इराणविरुद्धच्या युद्धात इस्रायलला अमेरिकेची मदत मिळत असली तरी, अमेरिकन सैन्य आता थेट लष्करी कारवाईच्या तयारीत आहे. इराणजवळच्या अमेरिकेच्या तळांवर सैन्याच्या हालचाली वाढल्या आहेत.

छावा •  दि. २१  जून • वृत्तसंस्था

वॉशिंग्टन: इराणविरुद्धच्या युद्धात इस्रायलला अमेरिकेची मदत मिळत आहे. पण अमेरिका थेट युद्धात सहभागी झालेली नाही. आता अमेरिकन सैन्य इराणविरुद्ध थेट लष्करी कारवाई करण्याच्या तयारीत आहे. इराण जवळ असलेल्या अमेरिकेच्या तळांवर सैन्याच्या लक्षवेधी घडामोडी सुरु झालेल्या आहेत. अमेरिकन सैन्य इराण जवळ इंधन भरणारी विमानं सातत्यानं तैनात करत आहे. अमेरिकेच्या युद्धनौकादेखील पश्चिम आशियाच्या दिशेनं वळल्या आहेत. त्यामुळे ट्रम्प प्रशासन इराणवर हल्ला करण्याची योजना आखत असल्याची शक्यता वर्तवली जात आहे.

इस्रायलनं १३ जूनला इराणवर हल्ले सुरु केले. इराणकडून इस्रायलला अतिशय कडवं प्रत्युत्तर देण्यात येत आहे. इराणनं क्षेपणास्त्रं डागत इस्रायलच्या प्रमुख शहरांना लक्ष्य केलं आहे. दोन्ही देशांतील संघर्ष टोकाला गेल्यानंतर इस्रायलचे पंतप्रधान नेतान्याहू यांनी अमेरिकेचे अध्यक्ष डोनाल्ड ट्रम्प यांना इराणविरुद्धच्या युद्धात मदत करण्याचं आवाहन केलं आहे. पण ट्रम्प यांनी अद्याप तरी याबद्दल कोणताही निर्णय घेतलेला नाही. मात्र अमेरिकेची फौज अलर्ट मोडवर दिसत आहे

बिझनेस स्टँडर्डच्या वृत्तानुसार, १६ जूनला कमीत कमी ३१ इंधन भरणारी विमानं अमेरिकेच्या तळांपासून युरोपच्या दिशेनं रवाना झाली. पश्चिम आशियात कारवाई करायची असल्यास विमानांना युरोपमध्ये थांबा घ्यावा लागतो. तैनात विमानांची नेमकी संख्या सांगण्यास अमेरिकेच्या अधिकाऱ्यांनी नकार दिला आहे.अमेरिकेकडून करण्यात आलेली विमानं पाहता त्यांच्या सैन्याकडून इराणमध्ये मोठी कारवाई केली जाऊ शकते. अमेरिकन नौदलाच्या निमित्ज कॅरियर स्ट्राईक ग्रुपपनं व्हिएतनाममधील आपला ठरलेला कार्यक्रम रद्द केलेला आहे. अमेरिकेची युद्धनौका दक्षिण चीन समुद्र सोडून पश्चिम आशियातील विमानवाहू नौकांमध्ये सहभागी होणार आहे. अमेरिकेनं इस्रायलसोबत इराणवर हल्ला करण्याचा निर्णय घेतल्यास इंधन भरणारी विमानं आणि विमानवाहू नौका महत्त्वाच्या ठरु शकतातइस्रायलनं इराणच्या अण्वस्त्र कार्यक्रमांच्या ठिकाणांना लक्ष्य करण्यासाठी बॉम्ब टाकले आहेत. मात्र यामुळे इराणच्या अण्वस्त्र कार्यक्रमाचं फारसं नुकसान झालेलं नाही. इराणचे अण्वस्त्र तळ जमिनीपासून बरेच खाली आहेत. इतक्या खोलवर असलेले तळ उद्ध्वस्त करणारे बॉम्ब, क्षेपणास्त्रं इस्रायलकडे नाहीत